كيف تصبح مثقف في اسبوع؟!!!!!!!!

[frame="1 80"]


اتبع النقاط التاليه وانضم الى عالم المثقفين:

1/البس غتره وامحط اللحيه والشنب

2/اذا سألك احد من تسمع له قل لفيروز وشاديه حتى لو انك ماتسمع الا لمزعل
وسعد جمعه.

3/اذا قالو لك من شاعرك المفضل قل محمود درويش وادونيس حتى لو انك ماتقرأ
الا ل(ضيدان بن قضعان وسعد بن جدلان).

4/ابتعد عن الكلام المباشر واعمد الى ((التعفيط))و ((التمطيط)) وبدل ماتقول ((في البدايه))
قل((بادىْ ذي بدء))
ولاتقول صعبه ومشوار ومدري ايش لازم تصبر وتتحمل ...... ترى الثقافة مهيب سهله !!

5/اذا كتبت مقال فلازم تطعمه ببعض الكلمات الرنانه واللي مالك غنى عنها مثل((الراديكاليه,
الامبرياليه,والميبراليه,والديماغوجيه,والميكافيليه) ) ولا هوب لازم تحطها بعد ماتكتب المقال
لا..... ابدء اذا قضلى المقال فلفزهن فيه منا كلمه ومناك كلمه ,الين يقضن,وان ماكتبت منهن
شيء تراك ماتفهم بالثقافه لو تحفظ سبعممية الف كتاب , وتقرأ ثمانمية موسوعه,وانتبه لا تقول ..
الرأسماليه ,والاشتراكيه,والقوميه ترى هالكلمات حقات مقفين من اول اما الحين مايوكلن عيش...

6/كثر من الكلمات اللي تنتهي بــ((قراطيه)) مثل الديمقراطيه,البيروقراطيه, الاستقراطيه الاوتوقراطيه,
واذا انزنقت ((فخربط)) لك اي كلمه واختمها بــ قراطيه مثل:
التبوقراطيه ,والخنقراطيه, والخربو قراطيه, ولاتخاف مافيه احد يبي يسألك ويقول وش معنى ذا الكلمه
عشان ماينكشف جهله ويدرون الناس انه مهوب مثقف

7/خربط لك اي كلام بس بشرط انه يكون مبهم وغير مفهوم ....واهم شيء اكتب من فوقه ((شعر فلان بن فلان))
عشان يعرفون القراء انه شعر حداثي...لايحسونه مقال او روايه.

8/انتبه لاتؤرخ بالهجري حتى لو كان هو تارخ المسلمين ترى المثقفين مايؤرخون الا بالميلادي
ويفضل بعد انك اذا كتبت قصيده حداثيه تكتب الشهر كتابه مهوب رقم زي كذا مارس 2004,ابريل2005,


انما ذا الشهر حقين المثقفين بقوة وينصح بعد انك تحط تحت التاريخ اسم اي عاصمه اوروبيه
((لندن ,باريس,جنيف)) حتى لو انك كاتب القصيده بحريملاء او شقراء

9/اذا جاء معك مقابله في التلفزيون ((حش))في الشعر الشعبي وشرشحه حتى لو انك تحبه وقل انه
شعر البسطاء والعامه وانه معول من معاول هدم اللغة العربيةولابد من اعلان الحرب عليه دون هواده!!

10/اذا سألك احد وش الجرايد اللي تقراهن انتبه!!تقول له الجزيره والرياض؟ عشان مايدري انك قروي
لا...قل له انك تقراء الحياة ,الشرق الاوسط,الاقتصاديه حتى لو انك مابعد شفتهن عالطبيعه
بس لزوم الثقافه

11/اذا قالك وش الاجواء اللي تجد فيها نفسك,لاتغلط هنا وتقول اذا جلست مع اهلي ,والااذا طلعت للبر
والا اذا صرت اضبب لا ياحبيبي, قل له انا تاسرني الليالي البيروتيه المقمره,وخصوصا في فصل الخريف
حتى لو ماتفرق معك بين الخريف والمربعانية

12/حاول دايم انك تفلسف وتلف وتدور في كل شيء وفي كل اجابه حتى لو ان الجواب حرفين
خله عشر سطور وكثر من الكلمات اللي ماتفهمها عشان مايفهمونها الناس ويتأكدون بما لايدع
مجالا للشك انك من كبار المثقفين.

منقول
[/frame]