خليتني مثل الكفيف

خليتني مثل الكفيف أتحراك

وعليك قلبي كل هم يتله

تأخذني الأفكار مع طيفك وذكراك

وألقاك لغز يتعب الفكر حله

لا قلت وين الحل قلت أتحداك

زودت حل اللغز يا زين عله

لا والذي سوا جمالك وسواك

حبك في قلبي ثابت في محله

ياليتني نسمة هواء تدخل أشفاك

أدخل لقلبك بالوفاء وأستحله

وأبني شموخ الحب داخل حناياك

ويصير قلبي ساكن قلب خله

وأروي ظمأ قلبي بشوفة محياك

بعدك عطش قلبي وقربك يبله



يا عين حرا نادر الروح تفداك

حبك شرف وأفديه بالعمر كله

سبحان ربي كملك في حلاياك

يا عود موز مايل فوق ظله

هلت دموع العين بأسباب فرقاك

أعمى عيوني دمعها اللي تهله

ثالث سنه ودموع عيني ترجاك

والحال ناحل حبك اللي يسله

" مما راق لى "