مين مستعد ؟! .. خلص بكفي !!

بسم الله الرحمن الرحيم
الحمد لله وكفى والصلاة والسلام على النبي المجتبى
صلى الله عليه وسلم



وبعد :

أيها الطلاب والطالبات ... أيها الشباب
كلنا رأينا شباب تونس وشباب مصر والآن شباب ليبيا ... يتحرك & يثور & يُغَيِّر & يصنع & يُحَوِّلْ & يزرع & يبني ... وكلنا قد حدثتنا أنفسنا بعمل ما عمله هؤلاء الشباب ... على مستوى حيّنا ومدينتنا ولا شك جامعتنا وكليتنا ... ولا شك ضقنا ذرعا ً بالتهميش الذي يطالنا والانتقاد الذي يوجه إلينا ... [ جيل فاشل ... جيل مايع ... جيل كسول ... ممنوع العمل ... تفكيرك صغير وعلى قدك ... بس تكبر بتقعد معنا الخ ] .. ولكن ورغم أنف الجميع اليوم سنتكلم وسنفعل ... لا لا ... بل سنفعل ونفعل ونفعل ...

يا شباب وشابات الأردن الحبيب ...
يكفينا كلاما ً وتنظيرا ً وحديثا ً للنفوس وتفرجا ً على الأحرار وتصويرا ً لهم وابتعادا ً عن حقوقنا وتجنبا ً لمشاكلنا وترقيعا ً لمصائبنا ... فوالله مصائبنا عظيمة ... شخصية وعامة ... والله العظيم كرامتنا مهدورة منذ سنين وإحنا ساكتين ... لا نريد أن نكون ممن يقولون عنهم على شاشات التلفاز في التحليلات السياسية الأغلبية الصامتة ... بل نريد أن ينبهر كل العالم بالشباب العربي المسلم بأنه صاحب كرامة ورفعة وعزة .. صحيح أنه يصمت ولكنه يثور وإذا ثار يغير تغيير جذري ...
وابتعادا ً عن هذا الأمر من قبلي أكلمكم في العمل وفي الجد وفي العرق والتعب والإرهاق ...

لست أستاذا ً عليكم بل أنا مقهور مشلول المصائب على رأسي والمقالب نأكلها كل يوم صامتين مميلين رؤوسنا مؤيدين ... سأتكلم في العمل لأننا جيل العمل وهذا موعد العمل ... ونتمنى التأييد من الجميع ...

أولا ً : مجانية التعليم ...
ول ول ول يا زلمة طوّل بالك !! ... لا حبيبي إنتا واياه ... لما شفت الـ70 مليار تبعات اللامبارك ... وخزائن الفلوس تبعات بن علي ... والـ 130 مليار تبعات القذافي ... مش بس مجانية تعليم !! بل مجانية حياة !! ... طيب ما بدي هذا الموضوع ... كل الدول المحيطة فينا الطالب فيها بتدرس ببلاش !! ... هم أحسن منا ؟! ... بنط واحد بحكي بلدنا فقيرة يا معلم ... بردّ عليك واحد من النقابات بقلك في الأردن معادن نادرة جدا ً لا توجد في أي بلد في العالم !! ... وبرد عليك واحد من المعارضة بقلك 40% من سعر تنكة البنزين ضريبة !! ... علينا أن نطالب بمجانية التعليم وخفض رسوم الساعات ... لأنها ستخفف الكثير والكثير ... بكفي إنو 40% من الطلبة في الجامعات تنافس والباقي عبارة عن موازي !! ... لأنو التعليم للي بدرس مش للي عندو فلوس !! ... وما بدنا جامعات عبارة عن شركات بدنا جامعات تعليمية تربوية ...

ثانيا ً : محاسبة الفساد المالي ...
يا رجل شو بدك بالماضي ؟ إحنا أولاد اليوم !! ... لا يا أخوي ... كل فاسد لازم نوخذ منه مصارينا ... (من النهفات : كتبت الجملة السابقة نوخذ منا مصاريه .. شايفين المصائب شو بتسوي !! ) ... ما دام عنا محاكم ... وعنا قانون وفي فساد والأدلة واضحة زي عين الشمس والأشخاص معروفين لليش ما يصير محاسبة ؟ إحنا كطلاب بدنا انحاسبهم بالضغط على كل من له المسؤولية أول اشي الفاسدين انطلعهم من جامعاتنا وثاني اشي انطالب بإحالتهم للقضاء وآخر اشي نضغط على القضاء عشان إحنا ما راح نركن إلهم ... وراح انضل نضغط ... وأنا هسا بفكر بالفرحة الي راح اتصيبنا لما انحصل ولو دينار واحد بس من هذول نبني فيه كلياتنا ولا نعمل فيه نشاط خيري في الجامعة ونعطيه ليتيم أو فقير أو انساعد فيه طالب يشتري فيه كتاب استاتيكا بست ليرات... والله المستعان دائما ً ...

ثالثا ً : الحريــــــــة ...
إحنا أحرار ... إحنا إلنا كرامة ... إحنا شباب المستقبل .. إحنا أساس الدول ومقياس تقدمها ... إحنا ... إحنا ... إحنا ... إلخ ... ما راح نرضى لحدّ مين ما كان يكون إنو يضيق علينا ... بدنا انعبر عن رأينا زي ما بدنا ... دكاترة ما بفهمونا بدنا نرفع اصبعنا وبكل أدب ونعطيه رأينا فيه ... يا دكتور مش فاهمين إشي يمكن لأنك أول مرة بتعطي المادة ويمكن لأنو السيجارة ما بتطفيها بالمحاضرة ويمكن لأنك بتغاوز مع جنس على جنس ويمكن .. الخ من المصائب الي عارفينها كل اياتنا ... من حقنا يصير في منابر نحكي فيها أشعارنا ومقالاتنا وإعلاناتنا وأفكارنا من حقنا يكون في مؤتمرات شبابية نقعد اناقش الكافتيريا واناقش مبنى 17 الخ .. بدون قمع وتخويق وما إلى ذلك !!
بدنا الشباب الي بالأحزاب يشتغلوا شغلهم ... لأنو هسا كل الدور ماشية على هذا الحكي والتقدم والنهضة بالكلية وبالأردن لازموا عمل جماعي منظم ... مش عمل مفرق ما بنعرف أولوا من آخروا ولا بنعرف صاحبوا شو بدو ... خلينا انشوف الشباب تشتغل وخليها اتصير خلافات بينهم ومشاكل ... ولا كيف بدنا نبني الوطن إذا ما كان في عمل منهم وفي تعارضات واتعرضوا لبعض وعرف كل واحد شو أفكار الثاني !! ...
بعدين خلينا انفكر بخطوات للأمام .. لليش مضيقين أفقنا ... بدنا اتحاد عام للطلبة في الأردن ... عيب إنو سمعتنا تنزل لتحت من ورا شغلة تافهة زي هاي مش عارفين نعملها ... والله الاتحاد العام في السودان اشي نار ... يا إخوان الاتحاد العام في اليمن عمل دستور للدولة !! ... اتخيلوا ... ونفسي أعرف عن أخوي في الكرك شو وضعوا وكيف جامعاتهم ؟ ونفس أعرف أخوي في اربد برضو شو وضعوا ؟ وهل بوخذ نفس المواد تبتعتي ولا بتختلف واذا عندو تقارير اللابات عشان اتساعدني ولا لأ !! .. بدنا نعمل مول كبير وضخم في الأردن نجتمع فيه كلنا نشتري من بعض كتب جديدة ومستعملة ويكون مدعوم من الدولة ماليا ً ... بدنا نتعرف على أهل اربد وأهل الطفيلة وأهل معان وأهل المفرق وأهل الأردن كلهم ... والله ما بعرف اشي عنهم !! وحسبي الله ونعم الوكيل بس ..
آخر اشي نقطة مهمة كثير ازهقناها كثيييير ... وبحكيها من حرقة كبيرة جدا ً يعني طلابنا جايين يتعلموا ويوخذوا الشهادة ويحسوا حالهم بني آدمين ... بس في ناس بتحبش الشباب وكل يوم بتبني مطب في وجوههم ... إذا ألقيت شعر عشان مثلا ً فياضات باكستان ثاني يوم ببدأوا يسألوا فيي ليش تكتب القصيدة ؟ وشو يعني كلمة كذا فيها ؟ وإنت بتصلي بأي مسجد ؟ وليش فلان الفلاني المعارض صاحب أبوك ؟ عشان بس كتبت قصيدة في إخوانا في باكستان قصيدة إنسانية بحتة ... وإذا كتبت قصيدة عشق في كليتي .. بستلموني تحقيقات ولجان تحقيق وإنذارات ومش عارف إيش !! ... عشاني كتبت إنو السقف بنقط مي أو بما معناه في قصيدتي !! ... بتروح بدك اشي من عميدك تبع شؤون الطلبة بروح بستشير الأجهزة الأمنية !! شو دخل الأجهزة الأمنية في أسبوع وطني بدي أسويه في الكلية تبعتي أعبر فيه عن حبي للوطن تبعي ... أو محاضرة بمناسبة الهجرة النبوية الشريفة ... إعطونا نفس حرية ... بس نفس وشوفوا كيف راح نعجبكم وراح نعجب الوطن ونعجب العالم كله .. بدي أسوي مشروع تخرج عبارة عن طيارة اتصور موقع وترسل الصور على جهاز لابتوب ثاني يوم في المخابرات العامة بعد اقتحام بيتك .. ليش ؟ ومتى ؟ ووين ؟ ... وآخر اشي بتدرش الهندسة كلها عشانهم وبتدرس عربي وبتصير معلم وبتعطي الشباب حصص في المدرسة الي جنب داركم .. والله قتلتونـــا ... فكو عنا ... بدنا نفس حريّة ...

في النهاية بحب أذكر بهاي المشاكل الي شخصيا ً أتعبتني وبتهمني كثيير
- مجانية التعليم
- ومحاسبة الفاسدين لا سيما المالي
- الحرية (الرأي والعمل الجماعي والأجهزة الأمنية والاتحاد العام للطلبة )

وحابب أختم بهاي الآية العظيمة عشان أأكد إنو شغلنا عبادة ولازم الي يشتغل معنا ينوي بهاي النية إنو بدنا نصلح عشان انفوت على الجنة وننجو من النار قال تعالى { قَالَ يَاقَوۡمِ أَرَأَيتُمۡ إِن كُنتُ عَلَىَ بَيِّنَةٍ مِّن رَّبِّى وَرَزَقَنِى مِنهُ رِزۡقًا حَسَنًا وَمَا أُرِيدُ أَنۡ أُخَالِفَكُم ۡإِلَى مَا أَنهَاكُمۡ عَنهُ إِنۡ أُرِيدُ إِلاَّ الإِصلاَحَ مَا استَطَعتُ وَمَا تَوۡفِيقِى إِلاَّ بِاللّهِ عَلَيهِ تَوَكَّلتُ وَإِلَيهِ أُنِيبُ }[ سورة هود .. آية 88]

مين مستعد ؟؟!!

طالب حرّ ذو كرامة !!